Ұлытау облысында “ӘЙЕЛ РУХЫ – ТАБЫСҚА ЖЕТЕЛЕЙТІН КҮШ” атты облыстық форум өтті
Ұлытау облысында Мемлекет басшысы Қасым-Жомарт Тоқаевтың 2025 жылды «Жұмысшы мамандықтар жылы» деп жариялауына орай ұйымдастырылған «Әйел рухы – табысқа жетелейтін күш» атты ауқымды облыстық форум өтті. Іс-шараның негізгі мақсаты – еңбек адамының мәртебесін арттыру, өндірісте жұмыс істейтін әйелдердің рөлін айқындау, олардың кәсіби жетістіктерін дәріптеу және еңбек саласындағы гендерлік теңдікті нығайту.
Форумға Ұлытау облысының ірі кәсіпорындарының қызметкерлері, шағын және орта бизнес өкілдері, жергілікті атқарушы органдардың мамандары, мәслихат депутаттары, қоғам белсенділері мен журналистер қатысты. Жалпы саны 200-ден астам адамды қамтыған шара өңірдегі еңбекқор әйелдердің басын қосып, тәжірибе алмасуға мүмкіндік берді.
Іс-шараның құрметті қонақтары қатарында «AMANAT» партиясының хатшысы Шолпан Каринова, Ұлытау облысы мәслихатының төрағасы Бауыржан Шыңғысов, облыс әкімінің орынбасары Зина Ақылбекова және «Orda FM» радиосының директоры, танымал журналист Әйкерім Есенәлі болды. Спикерлер өз сөздерінде еңбек нарығындағы өзгерістер, әйелдердің өндірістегі орны, олардың жаңа технологияларды меңгеруі мен кәсіби дамуына ерекше тоқталды.
Форум аясында еңбек жолында зор табысқа жеткен әйелдер өз тәжірибелерімен бөлісті. Олар өндірістік кәсіпорындарда, сервис және әлеуметтік салада, энергетика мен тау-кен өндірісінде қызмет етіп жүрген әйелдердің жетістіктерін, заманауи мамандықтарды игерудегі қиындықтары мен мүмкіндіктерін талқылады. Қатысушылар жұмысшы мамандықтарды жастар арасында насихаттау, әйелдердің біліктілігін арттыру және қауіпсіз еңбек жағдайын қамтамасыз ету мәселелерін жан-жақты қарастырды.
Сонымен қатар, форумда гендерлік теңдік, әйелдердің көшбасшылық қасиеттерін дамыту, әлеуметтік қолдау шаралары және өңір кәсіпорындарындағы әйелдердің еңбек жағдайын жақсарту бағытындағы бастамалар да сөз болды. Мамандар мен сарапшылар әйелдердің экономикадағы үлесі жылдан жылға артып келе жатқанын атап өтіп, олардың табандылығы, еңбекқорлығы және жаңашыл көзқарасы аймақтың тұрақты дамуы үшін маңызды екенін айтты.
Форумның басты мақсаты – еңбек адамының қоғамдағы орнын айқындау және өндіріс саласында қызмет етіп жүрген әйелдердің жетістіктерін кеңінен дәріптеу. Іс-шара Ұлытау облысындағы әйелдердің еңбек әлеуетін арттыруға, олардың кәсіби өсуіне және өзара қолдау мен ынтымақтастықты күшейтуге зор серпін берді.
Шара соңында қатысушылар аталған форумның өңірдегі еңбек мәдениетін дамытуға, әйелдердің табысқа жету жолындағы қолдауды күшейтуге бағытталған маңызды алаңға айналғанын атап өтті.