Ұлытау облысында әлеуметтік қамтамасыз ету аясында «Балауса» балабақшасының ашылуы

Мұқажан Жұмажанов ауылдық округінде мемлекеттік-жекеменшік әріптестік аясында 50 балаға арналған жаңа «Балауса» балабақшасының салтанатты ашылуы өтті. Бұл іс-шара ауылдың әлеуметтік дамуына серпін беретін, жас ұрпақтың игілігіне бағытталған маңызды қадам болып табылады және өңірде әлеуметтік қамтамасыз ету жүйесінің одан әрі дамуына үлес қосады.

Заманауи талаптарға сай жабдықталған балабақшада кең әрі жарық топ бөлмелері, оқу және ойын аймақтары жасақталған. Мұнда балалардың ой-өрісін, шығармашылығын дамыту, әлеуметтік дағдыларын қалыптастыру және ойын арқылы тәрбиелеу үшін барлық жағдай қарастырылған. Сонымен қатар, педагогикалық құрамда 9 тәжірибелі маман жұмысқа қабылданып, ауыл тұрғындары үшін жаңа жұмыс орындары ашылды.

Салтанатты шараға аудан әкімі Қанат Қожықаев қатысып, балабақшаның ашылуы – ауыл халқының әлеуметтік әл-ауқатын арттыруға бағытталған маңызды қадам екенін атап өтті. Сондай-ақ, Жаңаарқа ауданында бірнеше жекеменшік балабақшалардың ашылуына жетекшілік еткен облыстық мәслихат депутаты Бағдат Бекежановаға алғыс білдірді.

Шара барысында бүлдіршіндер өз өнерлерін көрсетіп, жиналған көпшілікке мерекелік көңіл-күй сыйлады. Балабақшаның ашылуы тек балаларға білім мен тәрбие берумен шектелмей, ауылдағы әлеуметтік инфрақұрылымды дамытуға, жастар мен отбасыларға қолайлы жағдай жасауға, сондай-ақ жергілікті халықтың өмір сапасын арттыруға септігін тигізеді.

Бұл балабақша – Ұлытау облысында әлеуметтік қамтамасыз етудің нақты көрінісі, ауыл халқының әл-ауқатын көтеруге бағытталған жүйелі шаралардың бір бөлігі. Алдағы уақытта осындай әлеуметтік нысандардың саны артатыны жоспарланып отыр, бұл өңірдің дамуына және жас ұрпақтың толыққанды білім алуына жол ашады.