Түркістан төрінде «Ұлы дала жорығы» марафон-бәйгесінің жеңімпаздары марапатталды

Республика көлемінде алғаш рет ұйымдастырылып отырған «Ұлы дала жорығы» марафон-бәйгесінің марапаттау рәсімі Түркістан облысында салтанатты түрде өтті.

Аламан бәйгеге Қазақстан бойынша 19 өңірдің шабандоздары қатысты. 12 күн бұрын бастау алған аламанда шабандоздар 1200 шақырымды бағындырды. Биыл тұңғыш рет өтіп отырған бұл бәйгенің баламасы әлемде жоқ деуге болады.

Салтанатты шарада сөз алған ҚР Мәдениет және спорт министрі Дәурен Абаев үздіктер мен жанкүйерлерді құттықтап, іс-шараның маңыздылығына тоқталып өтті.

— Бұл — бұрын-соңды болмаған марафон-бәйге. Сондай-ақ, отандық спортымыз үшін де, руханиятымыз үшін де теңдесіз тарихи оқиға. Тақымында тұлпары тулаған қайсар жігіттеріміз жігер танытты, намысты қолдан бермеуге бар күшін салды. Іс-шараға атсалысқан барша қауымға алғысымызды білдіреміз. Жеңіске жеткен шын мықтыларды шын жүректен құттықтаймыз! — деді министр.

«AMANAT» партиясының Атқарушы хатшысы Асхат Оралов дала дәстүрі мен ұлы көшпенділер мәдениеті қайта жаңғырғанына тоқталса, Түркістан облысының әкімі Дархан Сатыбалды теңдіссіз жоба қазақ руханияты мен спортын жоғары деңгейге көтергенін жеткізді.

— Мемлекет басшысы Қасым-Қасым-Жомарт Кемелұлы Тоқаев Түркістан жұртшылығымен кездесуі кезінде «Ұлы дала жорығы» марафон-бәйгесі турасында арнайы тоқталды. Президент мәлімдемесі республика көлемінде өтіп жатқан дүбірлі доданың мән-маңызын айшықтай түсті, — деді Дархан Сатыбалды.

Сондай-ақ «The Great Steppe tour» қоғамдық қорының төрағасы Әлібек Әлденей марафонды халықаралық деңгейде өткізу керектігін айтты.

12 күнге созылған «Ұлы дала жорығы» республикалық марафонының нәтижесінде бірінші орын иегері атанған Маңғыстау өңірінің «Көкмайнақ» командасына Дәурен Абаев пен Асхат Оралов сертификат пен медальді тарту етті. Бәйгенің жеңімпаздарына 24 млн. теңге көлемінде жүлде табысталды.

Ал, екінші орынды Жетісу облысының «Жетісу» командасы жеңіп алып, 12 млн. теңгені иеленді. Ат бәйгесінің қорытындысына сәйкес, үшінші орынды Түркістан облысының «Теріскей» командасы қол жеткізді. Олар 9 млн. теңге сыйақыны қанжығаларына байлады.

Төртінші орыннан көрінген жамбылдықтар 6 млн.теңге қаржылай сыйлыққа ие болды. Командалары жарыстан шығып қалып, мәреге жеке дара шауып келген 13 шабандоздың әрқайсысына 1 млн теңге ынталандыру сыйлығы берілді.

Айта кетейік, «Ұлы дала жорығы» – еліміздің 6 аймағын (Астана, Ақмола, Қарағанды, Ұлытау, Қызылорда. Түркістан облыстары) басып өтетін тұңғыш жалпыреспубликалық ат марафоны. Марафон-бәйгені ұйымдастырушылар – «The Great Steppe Tour» қоғамдық қоры, ҚР Мәдениет және спорт министрлігі мен Ұлттық спорт қауымдастығы. «Amanat» партиясы да қолдау көрсетуде. Бас серіктес – «Самұрық Қазына» АҚ. Серіктес – «Sportqory» спортты қолдау қоры.