Польша азаматшасы Қазақстан президенттігіне үміткер болғысы келеді
Елдегі Президент сайлауына кандидат ретінде Польша азаматшасы түсуге ниетті. Тіпті ол орталық сайлау комиссиясына бірнеше мәрте жүгінген, — деп хабарлайды muragerinfo.kz/ тілшісі.
Ақпарат Орталық сайлау комиссиясының ресми сайтында жарияланды. Дерекке сүйенсек, Балли Мажец есімді Польша азаматшасы сайлауға кандидат ретінде түсуге ниет білдірген. Десе де, оған мұндай мүмкіндік берілмепті. Орталықта заңмен қойылатын талаптар бойынша түсініктеме берілген.
«Орталық сайлау комиссиясы Республика Конституциясының 41-бабының 2-тармағына сәйкес Қазақстан Республикасының Президенті болып тумысынан Республика азаматы болып табылатын, қырық жасқа толған, мемлекеттік тілді еркін меңгерген, Қазақстанда соңғы он бес жыл бойы тұратын және жоғары білімі бар Республика азаматы сайлана алатынын хабарлайды», — делінген ақпаратта.
Сондай-ақ, Орталық сайлау комиссиясы «Қазақстан Республикасындағы сайлау туралы» Конституциялық заңның 54-бабының 1-тармағына сәйкес, Президент болып сайлану үшiн мемлекеттік қызметте немесе сайланбалы мемлекеттік лауазымдарда кемінде 5 жылды құрайтын жұмыс тәжірибесі болуға, сондай-ақ белсендi сайлау құқығына ие болуға тиiс екенін де ескеру керегіне тоқталған.