Қазақстан азаматы Ресей әскеріне шақырту алған

Санкт-Петербург қаласында Қазақстан азаматына әскерге шақыру қағазы берілген. Сыртқы істер министрлігі бұл ақпаратты растады, — деп хабарлайды muragerinfo.kz/ тілшісі.

Бұған дейін Ленинград облысының аймақтық БАҚ беттерінде  Санкт-Петербургте тұратын 31 жастағы қазақстандыққа өз ауданының муниципалды қызметінен әскерге шақыру қағазы келгені туралы ақпарат пайда болған.

Бұқаралық ақпарат құралдарындағы ақпаратқа сәйкес, қазақстандық 2013 жылдан бері Ресейде тұрады, 2017 жылы тұруға ықтиярхат алған, алайда Қазақстан азаматтығын өзгертпеген. Қазақстандық өзінің төлқұжатын көрсетіп, ешқандай құжатқа қол қоюдан және военкоматқа келуден бас тартқан. Мұның орнына ол елшілікке жүгінеді.

Сыртқы істер министрлігі Қазақстан Республикасы азаматынан осындай өтініштің түскенін растады. Оның қолында азаматтығын растайтын құжат бар. Қазір ақпаратты екі елдің мәліметтер базасында тексеріп жатыр.

«Мұндай жағдайлар болып тұрады, мүмкін, деректер базасында кейбір сәйкессіздіктер болған шығар. Азамат Ресейде тұрады делік, оның тұруға рұқсат қағазы бар. Алайда рұқсат қағаз дегеніміз азаматтық емес, ол Қазақстан азаматы болып қала береді. Бұл жағдайда Қазақстан Республикасының азаматы өзінің құжатын әскери комиссариатқа көрсете алады немесе біздің елшілікке тағы бір рет хабарласып, Қазақстан азаматы екеніне көз жеткізе алады. Бұл жерде ешқандай мәселе жоқ, тек оның Қазақстан азаматы екенін заңды түрде дәлелдеу керек», – деп түсіндірді Сыртқы істер министрлігінің ресми өкілі Айбек Смадияров.