Қарағандыда ер адам ойыншық тапаншамен ойын клубын тонап кеткен

Қарағандыда ер адам қызметкерлерді ойыншық тапаншамен қорқытып, ойын клубынан 4 миллионға жуық ақша ұрлап кеткен, — деп хабарлайды muragerinfo.kz/ тілшісі Polisia.kz басылымына сілтеме жасап.

Ойын клубының тоналғаны туралы ақпарат 30 қыркүйек күні сағат 12.00 шамасында келіп түскен. Оқиға орнына бірден жедел-тергеу тобы жіберілген.

Клуб қызметкерлерінің сөзінше, күдікті үнемі осы мекемеде ойнап жүрген. Алайда кенеттен тапаншаға ұқсас затпен қорқытып, ақша талап еткен екен.

Күдікті кассадағы 3,9 млн теңгені қолды қылып, оқиға орнынан ізін суытқан. 34 жастағы күдікті азамат бірден анықталды. Ол сол мекемедегі ойын барысында қомақты қаржысынан ұтылып қалғанын, оның орнын толтыру мақсатында осындай іске барғанын айтқан. Әрі клубты тонау үшін ойыншық тапаншаны арнайы сатып алған.

Күдіктіден айғақ зат тәркіленді. Аталған факті бойынша Қазақстан Республикасы Қылмыстық кодексінің 192-бабына (Қарақшылық) сәйкес қылмыстық іс қозғалды. Күдікті уақытша ұстау изоляторына қамалды. Тергеу амалдары жүріп жатыр.