Атырауда бір күнде екі жүкті әйел көз жұмды
Олардың неден қайтыс болғанын енді арнайы комиссия анықтайды, — деп хабарлайды muragerinfo.kz/ тілшісі.
Atpress.kz-тің хабарлауынша, алғашқы жағдай 12 қазан күні облыстық ауруханада тіркелді. Онда Мақат ауданының 33 жасар тұрғыны жүктілігінің 17-аптасында қайтыс болды.
Атырау облыстық денсаулық сақтау басқармасының басшысы Асхан Байдуәлиевтің айтуынша, марқұм «менингиома» диагнозымен невропатологтың есебінде тұрған. Оның бұл ауруы бір жыл бұрын басталыпты. Сол кезде келіншектің басы қатты ауырып, биыл сәуірде тексеруден өтіп, ем алған. Соңғы кездері ауруы асқына түсіп, жүрегі жиі айнитын болыпты.
«9 қазан күні облыстық аурухананың нейрохирургиялық бөліміне түсіп, оған ми тақтасының үстіндегі мидың қатерсіз ісігі деген диагноз қойылған», — деді Аcхан Байдуәлиев.
Науқас түрлі зерттеулерден өтіп, мамандардан кеңес алыпты. Тиісті ем тағайындалып, екі күннен кейін жағдайы нашарлауына байланысты жансақтау бөліміне ауыстырылған. Жасанды тыныс алу аппаратына қосылғанымен, келіншек қайтыс болды.
Екінші жағдай 12 қазан күні Мақат аудандық ауруханасында тіркелді. Қабылдау бөліміне жүктілігінің 32-аптасында 34 жастағы әйел келіп түскен. Оған алдын ала «пневмония» диагнозы қойылыпты. Жағдайы ауыр болғандықтан бірден жасанды тыныс алу аппаратына қосылған. Алайда көрсетілген емге қарамастан, науқас көз жұмды. Оған «вирустық бактериалдық генез сепсисі» деген диагноз қойылды.
Екі тұрғынның неден қайтыс болғанын анықтау үшін комиссия құрылды. Қолда бар материалдар жинақталып, патологоанатомиялық сараптама қорытындысынан кейін нақты жағдай анықталады.
Айта кетейік, екі әйелдің де артында балалары қалды.
Жыл басынан бері Атырау облысында 5 ана өлімі тіркелді. Ал 2021 жылы 20 жүкті әйел қайтыс болған. Олардың 16-сы коронавирустан көз жұмған болатын.