Павлодар облысында оқушылардың жаппай улануы: Мектеп әкімшілігі жазаланды

Павлодар облысында тоғыз оқушы түскі астан уланған. Мектеп директорына қатаң сөгіс жарияланды. Сондай-ақ, оқу орны директорының орынбасары мен әлеуметтік педагог тәртіптік жауапкершілікке тартылды, – деп хабарлайды muragerinfo.kz/ тілшісі.

Мектеп медбикесі де жазаланды. Оған қоса асхананы жалға алушыға қомақты айыппұл салынады.

Павлодар облысында Шарбақты ауданындағы №2 мектепте жаппай улану фактісі бойынша тергеу аяқталды. Облыстық білім басқармасының хабарлауынша, қазірдің өзінде мектеп асханасын жалға алушымен келісім-шартты бұзған.

«Шарбақты ауданының білім бөлімі қоғамдық тамақтандыруды ұйымдастыру ережесінің 8.5 тармағының 3 тармақшасына сәйкес жалға алушымен шартты біржақты тәртіппен бұзу туралы хабарлама жіберді. Сондай-ақ сотқа қызмет берушіні адал емес деп тану туралы талап арыз жолданды», – делінген хабарламада.

Кәсіпкер ӘҚБтК-нің 425-бабы «Халықтың санитариялық-эпидемиологиялық салауаттылығы саласындағы заңнама талаптарын, сондай-ақ гигиеналық нормаларды бұзу» бойынша әкімшілік жауапкершілікке тартылады. Бұл бұзушылық үшін 1,5 миллион теңге айыппұл қарастырылған, сонымен қатар қызметті тоқтата тұру да мүмкін.

Айта кету керек, тексеру барысында санитарлық дәрігерлер асханада зиянкестермен сапасыз күрес жүргізілгенін, бөлмеде шыбындардың ұшып жүргенін, көкөністер мен жемістердің сапасын растайтын құжаттардың жоқтығын анықтаған. Қоғамдық тамақтандыру бөлімшесінде ыдыс жууға арналған ванналардың бір бөлігіне ыстық және суық су берілмеген, тоңазытқыштарда термометрлер болмаған.

«Халықтың санитарлық-тұрмыстық салауаттылығы саласында жол берген заң бұзушылықтар үшін мектеп директоры, оның тәрбие ісі жөніндегі орынбасары және әлеуметтік педагог қатаң сөгіс түріндегі тәртіптік жауапкершілікке тартылды. Сонымен қатар, медицина қызметкеріне сөгіс жарияланды», – деп атап өтті ведомстводан.

Сондай-ақ, ауруханаға жатқызылған төрт мектеп оқушысының Shigella sonnei бактериясынан уланғанын айтты. Балалар жазылып, сабақтарына кірісті.