Шығыс Қазақстан облысының прокуратурасы ЕРАП арқылы әкімшілік тәртіпте шағым беру тәсілдерінің жаңарғанын түсіндірді

Қазақстан Республикасы Бас прокуратурасының Құқықтық статистика және арнайы есепке алу комитетінің Шығыс Қазақстан облысы бойынша департаменті шағымдарды электрондық форматта беру мүмкіндіктері кеңейгенін хабарлады.

Азаматтардың уақытын үнемдеу және қолайлылық үшін «Әкімшілік өндірістердің бірыңғай тізілімі» (ЕРАП) платформасының қоғамдық секторында Qamqor.gov.kz сервистінде кері байланыс функциясы іске қосылды.

Жаңа механизм әкімшілік іс жүргізуге қатысушыларға іс материалдарымен танысуға, шағымды істі қараған мемлекеттік органға тікелей жолдауға және жедел жауап алуға мүмкіндік береді. Шағым беру үшін «Әкімшілік құқық бұзушылықтарды шағымдандыру» бөлімі арқылы ЭЦҚ көмегімен авторизациядан өту қажет. Осыдан кейін пайдаланушы автоматты түрде ЕРАП-тың Қоғамдық секторына өтеді.

Функционал мәселенің мән-жайын толық жазуға, қажетті құжаттарды, фотосуреттер мен өзге де материалдарды қоса тіркеуге мүмкіндік береді. Өтініш жіберілгеннен кейін ол автоматты түрде тиісті мемлекеттік органның лауазымды тұлғасына жолданады, ал қарау нәтижесі пайдаланушының жеке кабинетінде көрсетіледі.

Сонымен қатар, ақпаратқа қол жеткізу мүмкіндіктері жаңартылып, кеңейтілді: енді процесс қатысушылары айыппұл төлеу туралы нұсқамаларды, жол қозғалысы ережелерін бұзу фактілері бойынша фото және бейнематериалдарды, сондай-ақ іске тіркелген өзге де құжаттарды қарап, оларды жүктей алады. Шағым беру жөніндегі қадамдық нұсқаулық Qamqor.gov.kz сайтындағы «Әкімшілік құқық бұзушылықтарды шағымдандыру» бөлімінде орналастырылған.