Боранбаев бостандыққа шықты
Ведомствоның мәліметінше, Қазақстан Республикасының Қылмыстық-атқару кодексінің 165-бабының 5-бөлігіне сәйкес, жазаны өтеуден мерзiмiнен бұрын босату тиiстi құжаттар келіп түскен күнi, ал егер құжаттар жұмыс күнi аяқталғаннан кейін алынса – келесi күнi таңертең жүргiзiледi.
«Осы жылдың 6 қарашасында Қ.Боранбаев бас бостандығынан айыру мекемесінен босатылды», — делінген Қылмыстық-атқару жүйесі комитетінің баспасөз қызметінің хабарламасында.
Бас бостандығын шектеуге сотталғандар Қазақстан Республикасы Қылмыстық-атқару кодексінің 13-тарауына сәйкес, пробациялық бақылау жағдайында жазасын тұрғылықты жері бойынша өтейді.
«Бас бостандығынан айырудың өтелмеген бөлiгi бас бостандығын шектеу түрiндегi жазаға ауыстырылған сотталған адам күзеттен босатылады және жазаны өтеу орнына бюджет қаражаты есебiнен өз бетінше барады», — хабарлады Қылмыстық-атқару жүйесі комитетінің баспасөз қызметі.
Комитет мекеме әкімшілігі сотталғанға тіркеу үшін пробация қызметіне келу бағыты мен уақытын көрсете отырып, жазасын өтеу орнына кетуге бұйрық беретінін, сондай-ақ оны сипаттайтын материалдарды пробация қызметіне жіберетінін нақтылады.