Ұлытау облысында жасөспірімдердің құқықтық мәдениетін арттыруға арналған форум өтті

Ұлытау облысында «Заң мен тәртіп» қағидатын жүзеге асыру мақсатында жасөспірімдер арасында құқықтық мәдениетті нығайтуға бағытталған форум ұйымдастырылды. Шараны Сәтбаев қаласының полиция бөлімі, прокуратура және әкімдік бірлесе өткізді. Форумда оқушылардың құқықтық сауаттылығы мен салауатты өмір салты кеңінен насихатталды.

Қаланың түрлі мектептерінен келген 300-ге жуық оқушы белсенді қатысып, құқықтық тақырыптарға арналған баяндамалар тыңдады. Спикерлер «Есірткіге жол жоқ» тақырыбында баяндама жасап, зиянды әдеттердің жеке адам мен қоғамға келтірер зиянын егжей-тегжейлі түсіндірді. Іс-шара барысында оқушылар «Отбасы – менің Отаным», «Жол қозғалысын білейік», «Салауатты өмірді таңдаймыз» секілді тақырыптарда сахналық қойылымдар қойып, өз білімдерін және шығармашылық қабілеттерін көрсетті.

Әсіресе, «Жас сақшы» және «Жас жол қозғалысы инспекторлары» топтарының көріністері көрермендердің ерекше ықыласына бөленді. Сәтбаев қалалық полиция бөлімінің бастығы Еркебұлан Байзақов жастарды салауатты өмір салтын ұстануға шақырып, олардың ел болашағы үшін маңызды рөл атқаратынын атап өтті.

Форумның жарқын сәттерінің бірі – каратэ шеберлерінің көрсетілімі болды. Сондай-ақ, полиция департаментінің арнайы мақсаттағы жедел жасағы жауынгерлік самбо тәсілдерін паш етіп, қатысушылардың зор қызығушылығын тудырды. Ұйымдастырушылардың айтуынша, бұл секілді іс-шаралар жастар арасында құқықтық сананы қалыптастыруға және қауіпсіз ортаны дамытуға ықпал етпек.