ШҚО: облыс әкімі Германия делегациясымен ынтымақтастықты кеңейту мен инвестициялық жобаларды талқылады
Бүгін Шығыс Қазақстан облысының әкімі Нұрымбет Сақтағанов Қазақстандағы Германия Федеративтік Республикасының елшілігінің екінші хатшысы Ульрих Кинне және жетекші неміс компанияларының өкілдерімен жұмыс кездесуі өткізді.
Кездесу барысында тараптар экономикалық саладағы екіжақты ынтымақтастықты кеңейту, бірлескен инвестициялық жобаларды іске асыру, инновациялық технологияларды енгізу және өңірдің стратегиялық маңызды салаларын дамыту мәселелерін талқылады. Арнайы назар ШҚО-ның негізгі өнеркәсіп бағыты болып табылатын металлургиялық кешенге, сондай-ақ агроөнеркәсіп саласына, туризмге және жоғары технологиялық салаларды дамытуға аударылды.
«Германия – біздің өңірдің маңызды технологиялық және экономикалық серіктесі. Биылғы жылдың қыркүйегінде Германия елшісінің сапары екіжақты диалогты нығайтып, ынтымақтастыққа жаңа мүмкіндіктер ашты. Шығыс Қазақстан облысында 70-тен астам өнеркәсіп кәсіпорны жұмыс істейді, сонымен қатар агроөнеркәсіп саласы мен туризм белсенді дамып келеді», — деді Нұрымбет Сақтағанов.
Кездесу барысында облыс әкімі неміс кәсіпкерлерін өңірде әртүрлі жобаларды жүзеге асыруға шақырып, ШҚО-ның инвестициялық тартымдылығын, дамыған инфрақұрылымын және шетелдік инвесторларға жергілікті биліктің қолдауын атап өтті. Германия тарапынан өз кезегінде ынтымақтастыққа мүдделілік білдіріліп, өңірдің озық технологияларды енгізу, бірлескен өнеркәсіптік жобаларды іске асыру және агроөнеркәсіп саласын дамыту үшін үлкен әлеуеті бар екені айтылды.
Сонымен қатар, өндірісті цифрландыру, экологиялық технологиялар мен энергетикалық жобаларды қоса алғанда, инновациялық салалардағы өзара іс-қимылды кеңейту перспективалары талқыланды. Тараптар тәжірибе алмасу мен нақты бірлескен бастамаларды дайындау бойынша консультациялар жүргізуге келісті.
Айта кету керек, биылғы жылдың басынан бері ШҚО мен Германия арасындағы тауар айналымы 39,5 млн АҚШ долларын құрап, экономикалық қатынастардың тұрақты дамып келе жатқанын көрсетеді және өзара ынтымақтастықты кеңейтуге кең мүмкіндік ашады.
Кездесу екіжақты серіктестікті нығайту жолында маңызды қадам болып, ШҚО экономикасын дамыту перспективалық бағыттарын талқылауға мүмкіндік берді және өңірдің шетелдік инвесторлар мен технологиялық компаниялар үшін негізгі серіктестердің бірі ретіндегі мәртебесін растады.