Алматыда балаларын түнде қаңғытып қойған 197 ата-анаға айыппұл салынды
13 маусым мен 18 маусым аралығында Алматы қаласының аумағында «Балалар түнгі қалада» жедел-алдын алу іс-шарасы өтті. Нәтижесінде жасөспірімдерге түнде ата-анасынсыз кіруге рұқсат берген алты ойын-сауық мекемелерінің басшылары жазаланды, деп хабарлайды muragerinfo.kz/
Іс-шараның бес күнінде ішкі істер органдарына әртүрлі құқық бұзушылық жасағаны үшін 282 жасөспірім жеткізілді, оның ішінде 161-і әкімшілік құқық бұзушылық жасағаны үшін, 35-і қараусыз және панасыз қалғаны үшін. Қиын өмірлік жағдайдағы балаларға қолдау көрсету орталығына қараусыз қалған 15 бала орналастырылды, — Алматы қалалық ПД Жергілікті полиция қызметі басқармасы бастығының орынбасары, — полиция подполковнигі Ержан Ұзабаев
Сонымен қатар, сегіз жасөспірім мен 11 тұрмысы нашар отбасы анықталды және есепке алынды.
Кәмелетке толмаған балалардың түнгі уақытта заңды өкілдерінсіз ойын-сауық орындарында және үйлерінен тыс жерлерде жүргені үшін 197 ата-ана әкімшілік жауапкершілікке тартылды. Түнгі уақытта заңды өкілдерінсіз жүрген балаларды ойын-сауық мекемелеріне кіргізгені үшін ойын-сауық мекемелерінің басшыларынан 6 лауазымды тұлға әкімшілік жауапкершілікке тартылды. Сондай-ақ, кәмелетке толмағандарға алкогольдік және темекі өнімдерін сатудың 8 дерегі анықталды, — деді Ержан Ұзабаев